weiter
Noten
 

Viertes Hundert
 

1.

Main Schatz is graizsauba,
Dös is gwis und woar,
Had Resarln auf'n Wangan
Und goldkrauslads Har.

2.

Zu Hoanfeld is Kirchdach,
Was wül main Schatz hab'n,
A zundarods Miadarl,
An Schniaream an blawm.

3.

Had mi main Löbdach
Koan Diarndl so gfraid,
Als wiar d'Kuahaldaevarl,
Das Mensch, das kniawaid.

4.

Main Schatz ihri Äugarln
San imma schen blau.
Dös is hald main Himm'l,
In den i gearn schau.

5.

I bin a frisch Büabarl,
Ha an frölich'n Muad,
Und wiar si da Danz drad,
So drah i main Huad.

6.

Was kloan is, is herzi,
Das mitlari liab,
Was groß is, is ung'schikd,
Han's afd schon brobiard.

7.
Du herzischens Diarndarl,
Du ligst ma in Sin,
Du ligst ma in Herz'n
Nain Glafta diaf drin.

8.

Diarndarl, steh auf von Böt,
Diarndarl, geh schaich di nöd,
Siachd's ja da Mond alloan,
Was wiar Zwoa dahn.

9.

Diarndarl steh auf von Böt,
I han main Kopf vawödt,
Das i a Bussarl kriach,
Wan i di siach.

10.

Da Draunstan is spizi,
Bain Bod'n is a rund,
Und wan i a aufrichdigs
Diarndarl nuar fund.

11.

Wan's z'Ligenfeld läut'n,
So schwingd si da Durm,
Und i winsch da vül Glick
Zu dain nitnaich'n Buam.

12.

I winsch da vül Glick,
Daß's da bessa dua geh'n,
Füar di Zaid, das'd mi gliabd hast,
Bedang i mi schen.

13.

In Wald schraid da Guga,
In See schwimm d'Fisch,
Wia gfraid mi nuar s'Häusarl,
Wo's Schatzarl drin is.

14.

Main Diarndarl, hast gherd,
Is's da nid da Müah weart,
Daß's von Bötarl aufstehsd
Und zum Fensta hergehsd?

15.

s'Diarndarl is hibsch,
Had a Füaßarl, a dicks,
Und a Herzarl, a woachs,
Und a Mäularl, a gschmoachs.

16.

Main Schatzarl is sauba,
Und had a schens Gwand,
A wacharlwarms Stübarl,
Una a Holz an da Wand.

17.

Main Schatzarl is sauba,
Nid z'groß und nid z'kloan,
Und i mag hald koan andri,
Als dö nuar alan.

18.

Als dö nuar alan,
Sunsd koan Diarn auf da Weld,
Häd's no so vül Küa
Und a no so vül Geld.

19.

Durt drobnad aum Berg'l,
Wo's Füxarl umlaufd,
Da had ma main Schatzarl
Sain Herz'l vakaufd.

20.

Dö Stearn glitzarn hell,
Und d'rum schau i auf d'Heh,
Maina Diarn ihri Äugarln
Glitzarn mehr no als dö.

21.

A Schwalm machd koan Suma,
Drum hairat nuar zua,
Das machd ma koan Kuma,
s'Gibd Diarndarln no gnua.

22.

Geh Diarndarl sai guad,
I kaf da an naig'n Huad,
Und a rosenrods Band,
Wan ma's Geld so waid langd.

23.

Achd Dach is a Woch'n,
Zwölf Monad a Jahr,
Kam das d'Liab had anghöbt,
Is's a wida goar.

24.

Durt zwischen zwoa Donabam
Singd a kloan Grül,
Da Daixl kan's Diarndl hol'n,
Wan's mi nid wül.

25.

z'Graz hab i a Diarndarl,
s'Is zaumartadiar,
Und wan is wüls hals'n,
So stehd da Kropf füar.

26.

Wal d'Laid so vül wissen
Und red'n üba mi,
So muas i ma deng'n,
Sö san schlechta als i.

27.

Diarndarl, was dengsda,
Dain Bua is bain Fensta,
Steh auf und lass'n ain,
Und nid a so schrain.

28.

Diarndarl, i liabad di,
Sag ma, wia kriag i di?
I sag das, wias'd mi kriagst:
Wans'd mi drai liabst.

29.

A Sprung übars Gassarl,
An Juchaza drauf,
An Klopfa an's Fenstarl,
Schens Schatzarl mach auf.

30.

Und machsd ma nid auf,
No, so laß'd a's hald blaib'n,
Am Sundach is Kirchtach,
Kansd a dahoam blaib'n.

31.

Zun Diarndarl bin i ganga
In stockfinstra Nachd,
Da kan ma do seg'n,
Was di Liab allas machd.

32.

Zun Diarndarl bin i ganga,
Hab's Fenstarl vafahld,
Und da bin i drai Woch'n
Auf da Maua umkrahlt.

33.

Main Schatzarl hoaßd Resarl,
Is resalad g'mal'n,
Han d'Kaserin gseg'n,
Had ma nid so guad gfall'n.

34.

Main Vada had gsagd:
I soll's kracha lass'n,
Wan's Böthstadl brichd,
Wiard ears macha lass'n.

35.

Von Wald bin i aussa,
Wear soll mi kena,
Und wear soll ma main schwarzaugad's
Diarndarl nema.

36.

Von Wald bin i aussa,
Wo's stockfinsta is,
Und i liab di von Herz'n,
Dös glaub ma füar gwiß.

37.

Wiar afd i zun Diarndarl
Von Schlaf'n hab grödt,
Had dös Garaisl gsagd: daß's
Vül z'schmal woar iar Böt.

38.

Main Schatzarl hoaßd Nanarl
Had schneewaißi Zahndarl,
Had schneewaißi Knia,
Awa gseg'n hab is nia.

39.

Du Diarndarl, du liabs,
Hasd a Göscharl, a süaß,
A Äugarl, a schwarz's,
Und a Füaßarl, a zard's.

40.

Afd schick i den waschad'n
Laid'n an Gruas,
So soll'n si wasch'n,
San selba voll Ruas.

41.

Wan i an main Diarndarl deng,
Und auf sain Böt,
So gspiar is's grad allawal,
Koan Dahoamblaim is nöd.

42.

Main Diarn is main Fraid,
Und auf mi had's a Schnaid,
Und a Schnaid muas ma ham,
Denn sunsd kimd ma nid z'sam.

43.

Herziga Tausendschatz,
Das'd mi den nima magsd?
Soll i denn wida geh'n,
Und bi so schen.

44.

Dö Waixl san saua,
Dö Kersch'n san süaß,
Main Diarndarl woar greßa,
Häd's nid kloani Füaß.

45.

Wan i a Jaga war
Schoiß i a Daub'n,
Dö rodi Resarln had
Und brauni Aug'n.

46.

Landlarisch danz'n
Kan nid a Jeda,
Kans selba nid rechd,
Awa main Vöda.

47.

Bi schon afd lusti gwesd,
Han danzd überal,
Und in Kaisa sain Saal
Danz i a no amal.

48.

Main herzig liabs Schatzarl,
Um was a di bitt',
Geh, gib ma a Schmatzarl,
Und nim mi um d'Mitt'.

49.

A waldbäurisch Gsangl,
Dös gehd üba all's,
Main Diarndarl is sauba
Bis au'm dick'n Hals.

50.

Main Schatz blaib i drai,
Wan i ausgeh in's Gai,
Wan i hoamkema dua,
Bin i wida iar Bua.

51.

Hiazd han i a Stoanarl
In Brun ainikaid,
Und hiazd han i a Schatzarl,
Das mi amal gfraid.

52.

Hiazd han i a Schatzarl,
Das mi amal gfraid,
Und hiazd wern's gar nid wiss'n,
Was röd'n soll'n, di Laid.

53.

In Wald is main Löb'n,
Und main Fraid is in Wald,
Wal d'Labarln duan rausch'n,
Und s'Jod'ln schen schald.

54.

Main Fraid is in Wald,
Wal's Jod'ln schen schald,
Und a Derndarl drin grasd,
Dös ma goar so guad gfald.

55.

A schens, a schens Häusarl,
A schens, a schens Böt,
A schens, a schens Diarndarl,
Sunsd heirath i nöd.

56.

Du herziga Schatz
Sai nid harib auf mi,
Han a andars Mensch ghabd,
Han vagess'n auf di.

57.

Zwoa kohlschwarzi Rössarln,
Und oans had an Stearn,
Wiar had mi main braunaugads
Diarndarl so gern.

58.

Am Eisberg glanzd d'Sun, und
Am Himm'l san d'Stern,
Main herzig liabs Schatzarl,
Wiar hab i di gern.

59.

's Diarndarl had gsagd,
I soll kema auf d'Nacht,
Si had's Bötarl aufböth,
Und had's Fensta afgmacht.

60.

Wo hast denn dain Ligastad,
Wo hast denn dain Böth?
Zwoa Staff'ln muasd auffistaig'n,
Bai da Nas'n is's nöd.

61.

Diarndarl, geh her zun Zaun,
Und laß di rechd anschau'n,
Wiar daini Äugarl san,
Schwarz oda braun.

62.

I geh nid her zun Zaun,
Und laß mi nid anschau'n,
Wiar maini Äugarln san,
Schwarz oda braun.

63.

San maini Äugarln
Schwarz oda nid,
Das woas i gwis,
Füar di daug'ns nid.

64.

's Ziddarnschlag'n, s' Ziddarnschlag'n,
Is a schens Spül,
Han a mal Ziddarng'schlag'n
Unta da Hüll.

65.

Da drunt'n bain Bach
Stehd a Haus oni Dach,
In den Haus is Niamsd drain,
Gehd da Fux aus und ain.

66.

Main Diarndarl is sauba
Von Fuaß bis zun Kopf,
Nuar am Hals had's a Waz'n,
Das nennan's an Kropf.

67.

Da drent'n in Wirdshaus,
Da gehds haind fidel,
Da raffa'n zehn Schraiba
Um an Haring sain Seel.

68.

I bin a Hüatabua
Aus da Lahn g'bürti,
An iads Adarl in Laib,
An iads Boanl rüard si.

69.

Und wan i a Boanl häd,
Das si nid rüard,
So liaß i ma's wögaschnai'n,
Damid's mi nid iard.

70.

Du Diarndl blaib ma drai,
Auf main Herz ward a Zwaih,
Brock'n a, gherd a dain,
Awa drai muasd ma sain.

71.

Gar Koana in Stand,
Der an Holzknechd fangd,
Der an Holzknechd raißd
Und au'm Schuß nida schmaißd.

72.

Him her, wan's di drausd,
Und i zoag da main Fausd,
Und so kloan als i bi,
Drau mi deant üba di.

73.

Da schau, maini Schuach
San von Fuxleda gmachd,
Sö schlafa'n bain Dach
Und geh'n aus bai da Nachd.

74.

Da Danzbod'n had a Lucka,
Und s'Diarndl is kloan,
Wan's nia duri dad schlupfa,
Was sollt i afd doan?

75.

Dö Fink'n han Gröpfarln,
Da singans damid,
Main Moam had an Kropf,
Awa singa kans nid.

76.

Zu main Diarndarl geh i
In Rög'n und in Wind,
Und wan ma a s'Wassa
In d'Schuach ainirind.

77.

Zu diar bin i ganga,
Bai diar had's mi gfraid,
Und zu diar geh'n i nima,
Da Wog is ma zwaid.

78.

Ear war ma nid zwaid,
Und ear war ma schon rechd,
Awa du biso ma zwida,
Und i bin da z'schlechd.

79.

Da Weg is ma z'waid,
Und da Berg is ma z'hoch,
So kanst da schon denga,
Daß i di nid mach.

80.

Was nutzd ma denn s'Gamsgebirg,
Wan's ma's vaschnaid,
Was nutzd ma denn s'Löb'n,
Was mi gar nima gfraid.

81.

Draimal uma Gard'nzaun,
Draimal um's Haus,
Und s'Diarndarl, das ma bschaff'n is,
Blaibd ma nid aus.

82.

Wiar sitz'n baisam
Untar'n Holzapflboam,
Wiar wern unsri Menscha
Schen schlaf'n dahoam.

83.

Duard drob'n auf'n Bergl,
Stehd a Drist'n Schaida,
Und duard danzd a alds Waih
Mid an Übaraida.

84.

Duard drob'n auf'n Bergl,
Da sitzd a kloans Kind,
Sain Vada is schienglad,
Sain Muada is blind.

85.

Schen molad und fain
Muas main Schatz amal sain,
Und schen rank um di Mit,
Denn sunsd mechd i'n nid.

86.

Gel Diarndarl, dain Vada,
Der war a Soldad,
Und wans'd du ma undrai wiarst
Wiar i a Krawad.

87.

Au'm Ast sitzd a Vögarl,
Das Vögarl singd schen,
Miar is grad, als klingad's:
"Zun Diarndarl sollst geh'n!"

88.

Oans, zwoa, drai, war füar mi,
Main Diarn is d'Säubasti,
Das main Diarn d'Säubast is,
Dös woaß i gwiß.

89.

Was nutzd mi a Täubarl,
Das nid in main Schlach,
Und was nutzd mi a Diarndarl,
Das mi hald nid mach.

90.

Schen grien is da Buxbam,
Schen gelb san d'Wurz'n,
Schau, wiar si sö gschmachi drag'n
d'Mad'ln, dö kurz'n.

91.

Had ma droamd, had ma droamd,
Und in Droam han i glachd,
Hab gmoand, i han's Diarndarl,
Han's Kopfbölstarl ghabd.

92.

Wia gfraid mi das Ding,
Das i ledi no bin,
Kim i hoam, wan i wül,
San dö Kinda schen stül.

93.

Dös oan Bergl aufi,
Dös andri nida,
Geh, laich ma dain Diarndarl,
I gib diars wida.

94.

Das Diarndarl herlaich'n
Duad seld'n a guad,
Wal ma's laichd nima z'rukkriagd
Wia ma's auslaicha duad.

95.

Noa, wansd auf dain Diarndarl
So hoagli wülst sain,
So nim a Papirl
Und wik'l dar's ain.

96.

Und duas in a Schachtl,
Und bind's hibsch fest zua,
So kimd da dain Löbdach
Koan Andra dazua.

97.

A lustiga Bua bin i,
Geh gern zu da Gaig'n,
Drum kinan dö Diarndarln
Mi alli guad laid'n.

98.

A lustiga Bua bin i
Und tring gern an Wain,
Awa wal i nid zahld hab,
Dearf i nindaschd rechd 'nain.

99.

A lustiga Bua bin i,
Bain Laid'n verachd,
Und hiazd bin i's schon gwönd,
Daß's ma goar nix mear machd.

100.

Dö Gsang'l san gsunga,
Und das Geld is vadahn,
I moanad, hiazd fang ma
Von fuarn wida an.



nach oben