weiter
Quelle:
Ein Beitrag zur
österreichischen Volkspoesie
Mitgeteilt von
Johann Nepomuk Vogl
Wien 1850
Tendler & Comp.
1.
Wan's Gamsböckl springt
Und die Nachtigall singt,
Und da Auahahn schreit
Is da Bua nima weit.
2.
S'is a Wedda am Himmel
Aber dunnern duad's nid,
Staig nur eina beim Fenster
Aber rumpeln därfst nid.
3.
Main Schatz is a Tischla
A Tischla muaß sain,
Der macht ma a Wiag'n
Und a Kindl glei drain.
4.
Main Schatz is a Schraiba
A Schraiba muaß sain,
Der schraibt miar an Liabsbriaf
Und an Gruas an di 'nein.
5.
Mein Schatz is a Raida
A Raida muaß sain,
Das Roß gherd in Kaisa
Da Raida gherd main.
6.
Kim do nid so häusi
Hab sel di do gern,
Du rennst da ja d'Füaß weg
Kindst a Zwergl no wern.
7.
Kloan bin i, kloan bleib i
Mag greßa nid wern,
Und an Schatz muaß i habn
Wie a Haselnußkern.
8.
Sag Bua, was fald dar ein
Daß du nid main wilst sein,
Daß du nid main wilst wern
Hab di so gern.
9.
Zwoa schneeweißi Täuberln
Fliag'n über mein Haus,
Und der Bua der miar bstimd is
Der kumd um nid aus.
10.
Geh weg von mein Fensta
Und las ma an Fried,
Was hilft dir dain Singa
Aufmach' i dar nid.
11.
Du laundlada Bua
Kimst vor frag'n nid dazua,
Wanst a Bussel willst hab'n
Muaßt mi nid so lang frag'n.
12.
Daß in Wald finsta is
Dös machd da Bam,
Wans Diandarl sauba is
Meld't sa si kam.
13.
Mein Herz muaß an Fehler hab'n
Dös is schon g'wiß,
Denn so oft i mein Buab'n siach
Gibt's ma an Riß.
14.
Ha ha, du bist harb
Seita göstern auf d'Nacht,
I han di nid g'hört
Sunsten häd i afg'macht.
15.
Koan Berg is so hoch,
Den dö Gams nid dastaigt,
Und koan Bua auf da Weld
Der drai oana blaibd.
16.
Im Winta wans kald is
Da warmst di an Eicht
Und a Liab do schon alt is
Wird rosti nid leicht.
17.
Die Liab is a Diarndarl
Da Vastand is sein Bua,
Und so g'scheid als er is
Foppt'sn denad no gnua.
18.
Koan See und koan Bacherl
Koan Fisch und koan Daicht,
Koan Bua is ma sauba gnua
Di merast'n z'laicht.
19.
Wan i dran denga dua
Wiar falsch mit miar da Bua,
Deng i ma awolst glai
I blaib da nid drai.
20.
Main Schatzerl is kema,
Was had er den bracht?
A Ringerl an's Fingerl,
A Bußl auf d'Nacht.
21.
Dort drunten bein Bachl
Steht a Mühl und a Sag,
Und mein Schatz drinn had gfragt:
Ob i'n goar nima mag?
22.
z'Lingfeld und St. Veid
Is koan Bua, der mi gfraid,
Und in Esch'naua Tal
San die schön Buama all.
23.
Zwoa kuaschwarzi Rößa;
A schebarnda Wag'n,
Das is ja mein Buabarl,
I kenn a in Fah'n.
24.
Zwoa kohlschwarze Kerschkern,
Mein Schatz hat mi graidsgern,
Gwoand had er um mi
Wiar i fuartganga bi.
25.
I tua nuar vorn Laid'n,
Als ob miar nix war,
Awa Herz und Gidanga
San denast so schwar.
26.
Wie schwer miar in Herz'n
Soll Niamst vernema,
Mögn'd öfda zwoa Liabi
Nid z'sama käma.
27.
Zwoa schneeweiße Täubarln,
Fliag'n hin übarn See,
Und mein Liab, gö geht unta,
Kimd nimma in d'Heh.
28.
A guads Wurt soll i göbn,
Und i han koans bai miar,
Han's z'Haus in da Truch'n
In an Papier.
29.
In Himmel san Sterndarln
Die Graids und die Quer,
Und i will nuar mein Schatz, und
Sunst will i nix mehr.
30.
I deng her und deng hi
In die Graids und die Quer,
I denk allwal an di, und
Sunst denk i nix mehr.
31.
Main Herz is an Uhr
Und blaibds a amal steh'n,
Machds glai mid an Bussarl
Main Schatz wieda geh'n.
32.
Wiar wiard's ma nuar gehn,
Bin nid raich und nid schen, und
Mid da Draihaid alloan
Wird's a's a nid lang doan.
33.
Und wan mi d'Laid frag'n dahn
Ob main Draihaid schen blüad,
So andwuart i eana:
Da Wind had's vafüard.
34.
Eh i main Büabarl laß,
Eh laß i all's,
Ehnda no d'Schuach und d'Strimpf,
s'Diachal von Hals.
35.
Eh i main Büabarl laß,
Eh laß i's Löb'n,
Und sold i main Bluad a
Bei an Dröpfarl heargöb'n.
36.
Eh i main Büabarl laß,
Eh laß i's Haus,
Nacha is do bain Laid'n
Da Dradsch amal aus.
37.
Das is ja main Büabarl,
I kenn a in Geh'n,
Gar gros is a nid, awa
Gar so vül schen.
38.
Main Herz und main Sinn
San z'Schwarzenbach drim,
Und wiar geh i den an,
Daß is aussa kriag'n kann.
39.
A schöns a rots Hüadl,
A Dopplband'l,
Main Schatz is a Raida
Aus'n Obaland'l.
40.
Drei Jahr had er z'raid'n,
Nacha wiard a glai frai,
Oan Jahr bleim ma ledi,
Nacha hairat'n ma glai.
41.
Am Angarl stehd a Bamarl,
Dragd Nagawitzbirn,
Hast di allimal gmeldt,
Wan i: schens Biabarl, g'schrian.
42.
Schau, schau, wias regna duad,
Schau, schau, wias giaßd,
Schau, schau, wias Wassa
Von Dach abaschiaßd.
43.
Wans in Himml drob'n danz'n,
Singan d'Engarln dazua,
Und hör i a Ziddarn schlag'n,
Is's ma schon gnua.
44.
Geh', setz di zu miar her
Und mach ma an Gspoas,
Afd kriagst frischi Mili
Und Buda und Kas.
45.
I wollt nuar, i häd di
Main Lebtach nid gseg'n,
I woaß, das 's main Herz'n
Vül leichta war g'scheg'n.
46.
So bhiad di God, Büabarl,
Wals'd oanmal schon gehst.
Und schau, das'd in Hoamweg
Di nindaschd anstesd.
47.
Schen blau is da See,
Und main Herz duad ma weh,
Und main Herz wird nid gsund,
Bis da Bua wieda kumd.
48.
Aum Bod'n kriach'n d'Nöbel,
Auf da Heh wahd da Wind,
Unsri Liab is hald aus, und
Zweg'n we denn so g'schwind?
49.
Wan d'Hoanfelda danz'n,
So danz i nid mid,
I müaßd mi ja füarcht'n
I kriagad an Drid.
50.
Zwoa Resarln in Gart'n,
Zwoa Föhran in Wald,
In a jungs saubar's Büabarl
Valiabd ma si baldd.
51.
Main Büabarl is sauba,
Nid z'gros und nid z'kloan,
Had klizadi Aug'n, und
Gherd miar ganz alloan.
52.
Du moansd, du warst schen,
Dös is awa nid war,
Gehst grump und bist schienglad,
Und hast a rod's Haar.
53.
A g'schegads par Ochsen,
A schneewaißi Kua,
Dö gibd main Vada,
Wan i heiratn dua.
54.
Dön Buam, den i nid mach,
Dön siach i alli Dach,
Dör miar main Herz erfraid,
Der is so waid.
55.
Von Wald bin i führa,
Wo's stockfinsta is,
Und i liab di von Herz'n,
Dös glaub ma füar g'wis.
56.
A fungelneugs Häuserl
Mit Breder vaschlag'n, und
Hiazd könt i main ald'n Schatz
A wida hab'n.
57.
Kloan bist und kloan bin i,
So heirat'n ma zsam,
Du kriagst a kloans Waibarl,
Und i an kloan Mann.
58.
I woaß nid, wia's is,
Kan mi nid dakena,
Sol a naig's Büabarl liab'n,
Und is's ald' vül schena.
59.
Dö Laid san ma faind,
Und sogar maini Fraind,
Und i woaß schon z'weg'n was,
Wal i's Büabarl nid laß.
60.
Ewen i main Buab'n laß,
Ewen laß i's Löb'n,
Afd brauchd ma main Vada
Koan Heiratsguad z'göb'n.
61.
Zwisch'n daina und maina
Is a waidi Gass'n,
Und wansd mi nid liab'n wilsd,
Kanst a's blaib'n lass'n.
62.
Wan i an main Schatzerl deng
Und an sain Drai,
Deng i ma allimal:
War i dabai.
63.
Und da lachd a, da lachd a,
Da schölmischi Diab,
Als wan ears nid gwußd häd,
Daß i'n gar so viel liab.
64.
Gib mar's aussa, was'd d'ma gstohl'n hast,
Gib ma aussa main Herz,
Noan bhald's nuar, noan bhald's nuar,
I mach da koan Schmerz.
65.
Noan bhald's nuar, noan bhald's nuar,
Es war nuar main Scherz,
I g'hear dain, du g'hearst main,
Oans in Andern sain Herz.
66.
Auf da Alma gibd's Kalma,
Gibd's waixlbrauni Küa,
Gibd's gschegadi Ochs'n
Und kohlschwarzi Stiar.
67.
Und fünf Goaß und nain Küa,
Sex Böck und drai Stiar,
Und oan Ochs und zween Kalm,
Dös gherd uns auf da Alm.
68.
Main Voda, main Muada,
Main Schwesta, main Bruda,
Main ganzi Fraindschaft
Han ma's Büabarl veracht.
69.
Liabs Schatzers dain Herzl
Kan i nid verschenga,
Das höb i miar auf
Zu oan Angedenga.
70.
Han nix als a Haus und
A gschegadi Kua,
Und a Spinradl und a Bötstadl,
Und a Bötarl dazua.
71.
I woaß a kloans Glöckarl,
Das had an hell'n Klang,
Und i woas a frisch's Büabarl,
Das had an schen Gsang.
72.
Was soll i den singa,
Und wan i nix kan,
Und sing i mit'n Henan,
So zraißd mi da Hahn.
73.
Schen grian is da Klee,
Wan ear afgehd in d'Heh,
Schen frisch is main Bua,
Wan i'n afmundarn dua.
74.
Völli aus is's mid miar,
Wan i'n Buam nid dasiah,
Söldn kima hald z'sam,
Wal ma gar so waid hab'n.
75.
Und i woaß nid, wiar's is,
Daß'd ma gar so liab bist,
Dö Laid seg'n miar's an,
Daß i di gar so gern han.
76.
Wan zwoa vanand schaid'n,
Duad's Herzerl gar weh,
Schwiman d'Äugerln in Wassa,
Wiar d'Fischarln in See.
77.
Wiar d'Fischarln in See,
Schwiman hin, schwiman he,
Schwima auf und schwiman nida,
Kimsd Schatzerl bald wida?
78.
Main Herz und dain Herz
San z'sam vabund'n,
Und s'Schlüßerl, das aufspiard,
Wird nima gfund'n.
79.
s'Wird nima gfund'n,
Und s'spiard nima af,
s'Is a brinadi Liab
Und a Graizschlöß'l d'raf.
80.
Sagst allwal von Schaid'n,
Von Nimakäma,
Und i wiar amal schaid'n,
Wir nimakäma.
81.
Und wan i wiar schaid'n,
Wiar nima käma,
Da wern daini Äugarln
In Wassa schwimma.
82.
In Wassa wern's schwimma,
Wern sain so bedrüabd,
Und i wollt und i häd di
Main Lebtach nid gliabd.
83.
I han eng's schon gsagd,
Und i sag eng's nomal,
Wern eng d'Augna schon aufgöhn,
Wan i fuart bin amal.
84.
Wan i auf's Almarl geh,
Had's an Raif, had's an Schnee,
Wan i wieda hoamzu geh,
Blüad der grien Klee.
85.
Du Vögarl, du gschafdigs,
Du fliagst übarn See,
Geh hol ma das Reserl
Dort ob'n von da Heh.
86.
Dö Vögarl, dö singan,
Duad allas si gfrain,
Und i hals hald main Buam, und
s'Kan schenars nix sain.
87.
Main Schatz is a Jaga,
A soakrischa Bua,
Ear schiaßd ma di Gamsböck
Und bußl'd mi gnua.
88.
's Mensch in da Fledamühl
Halsd iarn Buam, wan ears wül,
Halsd iarn Buam, wan ears wül,
's Mensch in da Mühl.
89.
An Winta, an Suma,
Und nacha is's gar,
Und i hairat main Schatz, und
Afd san ma a Par.
90.
Zwoa Anten in Daich
Und zwoa Fischarln in See,
Und main Liab, dö gehd unta,
Kimd nima in d'Heh.
91.
Aus is's hiazd mit miar,
Und main Haus had koan Tür,
Und main Haus had koan Gschloß,
Und main Schatz bin i los.
92.
Wia hoch a da Himm'l,
Wia glanzad di Stern,
Und ana Andarn iar Schatz
Kan a maina no wern.
93.
Für Allas war z'helfa,
Alli Krang'n wur'n g'sund,
Wan ma's rechd Kräudl kenad
Und wan ma's a fund.
94.
A Hof und a Kua,
Und a Haus und a Geld,
Und a lustiga Bua
Is a Fraid in da Weld.
95.
In Dal liagd da Nöbl,
Do am Beri is's klar,
Was d'Laid von main Schatz sag'n
Is allas nid wahr.
96.
Dö Fingan hab'n Halmarl drag'n
Und a Nestarl ausg'machd,
Und i und da Bua, wiar hab'n
Zugseg'n und glachd.
97.
Main Vada is angschmiard,
In Hund han i aingspiard,
Damid er nid beld,
Wan main Büabarl si meld't.
98.
Da Wind sausd in Wald, und
Aufmach i da bald,
Muas nuar s'Kidarl anleg'n,
Den sunst wars ma z'kald.
99.
Muas a Kidarl anleg'n
Und a Strimpfl dazua,
Nacha kina ma bussaln
Die ganzi Nachd gnua.
100.
Main Bua is ma liawa
Als Alls auf da Weld,
Als wia Silba und Gold, und
In Kaisa sain Geld.
nach oben