weitere Hundert
 

Zweites Hundert
 

1.

A erligs Geblüat
Und a aufrichtigs Gmüat,
Und a Herzl a drai's,
Das is Östreicha Weis.

2.

Von Gamsböckl s'Horn und
Von Hirscherl das Gweih,
Von Schildhahn di Fedarn,
Von Diarndarl die Drai.

3.

Main Diarndl is handsam,
Zun Tanzen schön langsam,
Zun Afmachen gschwind,
Wan da rechti Bua kimd.

4.

Das Dirndl ghört main,
Es mag wiadawöl sain,
Es mag wiadawöl wern,
I hab's denad z'tod gern.

5.

Da Wein und di Liab
Mach'n d'Aug'n an oft trüab,
Das ma gar nima siacht,
Was um an Allas g'schiacht.

6.

Halbs Zinn und halbs Blei,
Und halbs liab i di drai,
Und halbs liab i di falsch,
Und i sag dir nid all's.

7.

Möcht a Weinfalta sain,
Kehrat überall ein,
Sprechad umadum zua,
Bis i bußelt häd gnua.

8.
A Schneeberl had's gschneibt,
Alli Bergarl san waiß,
Und i woas ma schon wida
A Diarndl a nai's.

9.

A Schneeberl had's gschneibt,
Habs waden müass'n,
Und hiazd hab i main Tausendschatz
Graden müass'n.

10.

Hiazt brauch i zwoa Herzerln,
A falschs und a drai's,
Den hiazt hab i zwoa Diarndarln,
A alt's und a nai's.

11.

Wan koan See und koan Wald,
Und koan Stern und koan Wein,
Und koan Diarndarl nid war,
Möcht i a nima sain.

12.

Wan da Wind schön stark geht,
Daß d'Laberln rausch'n,
Geh her main liabs Diarndarl
Dama Herzl tausch'n.

13.

Der Holzknecht in Wald,
Der hackt, daß's all's knallt,
Der singt, daß all's klingt,
Bis sain Diarndl 'nein kimd.

14.

I rauch an Tabag,
Und i rauch'n schön stad,
Und a schens Diarndl warst,
Wans d'ma aufmach'n dadst.

15.

I rauch an Tabag,
Und i rauch an Schwama,
Und i bin ja weg'n deina
Nid zuwi ganga.

16.

I bin ja nid da,
Daß i di so gern häd,
Und i bin ja nur da,
Daß i siach, wias da geht.

17.

Du schwarzaugads Diarndarl,
Wia fangsd' as den an,
Daß'd d'Liab aus dain Augna
So blingaz'n kan.

18.

Wans z'Ligenfeld läuten,
So schwingt si da Turm,
Und d'Lingfelda Madeln
Kriagd koani koan Buam.

19.

Main Diarndarl sein Göscherl
Is a Briaf zun Betschir'n,
A andra wia i, owa
Derfs nid brobirn.

20.

Main Dirn auf da Alm
Is di schönst auf da Weld,
Da brauch i koan Frack
Und koan Pfenni koan Geld.

21.

s'Reserl in Dürnitz,
Dö had eng an Dorn,
Und wia kloana da Nigl,
Wia greßa da Zorn.

22.

Haind kimi i no umi
Zu diar übarn See,
Und fiel a da Draunstoan
Mitt'n ein von da Heh.

23.

A Büchsarl zun Schiaß'n,
A Ranzerl zun Jag'n, und
A Diarndarl zun bussaln
Afd is's zun dadrag'n.

24.

Viel Geld in da Dasch'n
War fraili nid schlecht,
Do a schens molads Diarndarl,
Dös war ma hald recht.

25.

Schen molad und fain
Muaß main Schatzarl hald sain,
Und hibsch rank um di Mit,
Denn sunst mechd is hald nid.

26.

A süaß Göscharl muaß hab'n
Zun Schmazarln vagrab'n,
Und d'Äugarln schen braun
Daß's mi gfraid aini z'schaun.

27.

I bin a jungs Bürscharl
Und fahr auf da Draun,
Bei da Nacht mit main Diarndarl,
Bain Tag mit main Braun.

28.

Was had den da Baua
Mid'n Menschern so ghoam,
Had selba a Waih und
Sain Böt a daheam.

29.

Main anschichti Kaisch'n
Dort ob'n auf da Lahn,
Is ma gwax'n in's Herz, wia
Dort drobmat auf'n Stoan.

30.

Grasgrien is da Hollastamm,
Schneewais is dö Blüa,
Main Schatzarl, di hab i gern,
Sag: wiar is mit diar?

31.

In Heubodn da rauschd's, und
Das Diarndarl, das lauschd,
Aba Büabarl geh stoad,
's is di Ehr glai varstroat.

32.

Geh schau mi nid an so,
Mach d'Äugarln do zua,
I brauch ja zun Halsen
d'Latern nid dazua.

33.

Durt unten in Dal is
A Birkhahn varreckt, und
Da hab'n glai di Jaga,
Dö Fedarn aufgsteckt.

34.

Hairat'n dadst schon gern,
Kannst no koan Schaf ni scheer'n,
Kocha kannst a nid guad,
Daß 's schmecka duad.

35.

Da dronat aum Bergl,
Da stehd a Rundeln,
Und da danz'n drai Schnaida
Um a Wassaboudel'n.

36.

Und voraus main Diarndarl
Wird bitterli woan,
Den an Buam, so wiar i bin,
Da woaß sa si koan.

37.

Mälknödl und Mälknödl,
Kochd allaweil d'Moam,
Und wan ma wida Mälknäödl hab'n,
Geh'n i nid hoam.

38.

I woas a arms Diandarl,
Das nim i um d'Mitt,
Was hälfad ma s'Geld a,
Bein Geld schlaft ma nid.

39.

Da oben auf'n Astel
Sitzd a Fing und a Zeis,
Und a Diarndl, a schwarz's, wiard
Sain Lebdach nid weis.

40.
Bhiad di God, Lab und Gras,
Und du famad's Biar,
Bai 'nar Andarn is a guad sain,
Nid nuar bai diar

41.

Koan Schatz und koan Geld, und
Koan Haus und koan Feld,
Und a Kerl, wiar i bin,
Soll no leb'n auf da Weld?

42.

Derfst nima so woana,
Derfst nid a so doan,
Bisd a graizsaubars Diarndarl,
Laß di nid aloan.

43.

In Baierland drent'n,
Da wart a schens Korn,
Und da hab i main Diarndarl
Au'm Danzbod'n varloarn.

44.

Wan da Gadarn schwar aufgehd,
Gehd a schwer wida zua,
Wan ma's Diarndarl in Haus had,
So zraißt ma koani Schua.

45.

's Diarndarl in Haus
Is ma lieba als drausd,
Dearf nid so waid laf'n,
Wan da Wind a so hausd.

46.

A Diarndarl in Haus,
Dös is no koan G'winn,
Wasd' in Schuach'n nid brauchst,
Lafst in Strumpfseck'ln hin.

47.

A Bittl voll Kersch'n,
A Weixl drunta,
A Bußarl af's Herz'l
Machd's Diarndarl munta.

48.

Du Diarndarl, du liabs,
Hast a Göscharl a süaß's,
Hast a Laibarl a weiß's
Und a Herzarl a drai's.

49.

Es gfraid mi nix mehr,
Als das i nix hab,
Hiazd gwind ma koan Kaisa,
Koan Küni was ab.

50.

Main Diarndarl war rar,
Wans a nid a so war,
Wans hoamli sain kann
Steht iehm jeda Bua an.

51.

Das landlerisch Geigna,
Und's Gass'ln af d'Nachd,
Das had mi bain Daixl,
So liadarli g'macht.

52.
I was nid, is wahr,
Oda bild i miars ein,
So drai als wiar i
Kan koan andra Bua sain.

53.

Du schwarzaugads Diarndarl,
Du bunkads, du kloans,
Zweg'n da Liab dan ma heirat'n,
Owa Geld ham ma koans.

54.

I woas a schens Almarl,
Und d'selb'n an grean Platz,
Dort gehd a schens Diarndarl,
Und das is main Schatz.

55.

Was gehd iar no a,
A Kidarl blitzbla,
Und a Jöparl a nais,
Und a Herzl a drais.

56.

Aus'n Dal bin i ganga,
Bin d'Alm aufi grend,
Und glei had mi main Diarndarl
An Juchaza kend.

57.

Main Schatzarl is gwaxen
Wiar a Tonaboam grad,
's is koan Madl in Landl,
Dö di Buam so gern had.

58.
Wia hecha da Duarn,
Wia schena das Gläut,
Und wiar waida zun Diarndarl,
Wia greßa di Fraid.

59.

Main Diarndarl, mi foppst nid,
Dain Schenhaid is zweng,
San no andri dein'sgleich'n,
Bideng das a weng.

60.

No, du main liabs Mensch
Derfst nid gar so spred doan,
's gibt no mehr saubri Diarndarln,
Du bist nid alloan.

61.

Daßd' grad nid sauba bist,
Das sag i nid,
Wans'd owa a wenig hibscha warst,
Schaden dad's nid.

62.

Dort drobmat af'n Spitz
Had das Vögarl sain Sitz,
Wans Diarndarl nit sauba war,
Mechd is ja nid.

63.

Wan d'Haselnuß zaidi san,
Sans a schen braun,
Und hab jeda sain Diarndarl,
Muas i a um oans schau'n.

64.

Der Adam und d'Eva
Hab'n 's Bussaln dadacht,
Und i und main Diarndarl
Han's nochi glai gmachd.

65.

Daß i liadarli bin
Machd ma a just koan Fraid,
I muaß ma hald denga
's gibt mehr solchi Laid.

66.

s'Halsen und s'Bussalgeb'n
Sagn's is a Sind,
Hat miars main Muada glernd
Als a kloans Kind.

67.

Gherd oan a schens Diarndarl,
So had er a Fraid,
Und gherd eam a Schiachi,
So bringd's eam koan Neid.

68.

Und a frischi Halb Biar
Mit an schneewaiß'n Fam,
Und vor Zwölfi af d'Nachd
Gehn i niamals nid hoam.

69.

I bin hald a frischa
Graizlustiga Bua,
Han a Schnaid wiar da Deixl
Und Geld niamals gnua.

70.

In Wald han i drausd'n
A Schlaghäusl gricht,
An alds Weih han i gfanga,
Das Ding had mi gifd.

71.

Warum soll i main Diarndarl
Nid bussaln und liabn,
Wans d'Vögarln af'n Boam duan,
Daß d'Nastaln si biagn.

72.

A frischi Maß Biar
Mid an Fam, an waiß'n,
Und haind gehn i nid fuart
Bis's mi aussischmaiß'n.

73.

Wan is Diarndarl hals'n dua,
Druckd's ihri Äugerln zua,
Machd, als ob's schlaf'n dad,
Uns lachd schen stad.

74.

Das Jag'n is a Fraid,
Awa hoamli muaß gscheg'n,
Und da Grien derf dabei nid
Den Schitz'n daseg'n.

75.

Af'n Hahnapfalz gehn i
In Reg'n und in Schnee,
Und main Jodler hörn d'Sterndarln
Und d'Sun in da Heh.

76.

's Hirscharl in Dal, und
Di Gams af'n Spitz'n,
Und a lustig's Löbn is's
Um an Wildbroadschitz'n.

77.

Wiar hecha di Rigeln,
Wiar flinka di Gams,
Und wiar kloana di Diarndarln,
Wiar herziga sans.

78.

I bin hald a Wildbroadschitz,
A graizfidels Bluad,
Und drag hald an Gamsbart,
Da sechd's, af main Huad.

79.

's Wildschiaß'n is main Fraid,
Mehr als di Waibalaid,
Wan d'Büchsarln lusti knall'n,
Afd duad ma's gfall'n.

80.

Han a Haus wiar a Gschloß
z'Hegst droben af da Heh,
Mid'n Dach hengts in Nöbl,
Mid'n Grund stehd's in Schnee.

81.

A Pfeifa Tabag
Und a Krüagl voll Biar,
Is ma lang nid so liab
Als a Bussarl von diar.

82.

An aufrichdigs Diarndarl,
Is nid zun dafrag'n,
Miar zimd, da letzd Schaua
Had alli daschlag'n.

83.

Um da Schwagrin iar Hidd'n,
Da singan di Schwalb'n,
Wans'd a Gamsl willst schiaß'n,
Drob'n steh'ns af da Alm.

84.
Dort ob'n af da Heh
Steht a Gams und a Reh, und
I kinds nid daschiaß'n,
Das Herz dad ma z'weh.

85.
Da drob'n af da Heh,
Steht a Gams und a Reh, und
A Hirsch und a Schwain, und
Das Diarndarl gherd main.

86.

A lustiga Bua
Bin hald amal i,
Und i han hald koan Geld,
Wal i z'liadarli bi.

87.

's Hirschel springt über's Bach,
Springt an scheu Diarndarl nach,
Stolpad si übarn Stoan,
Brichd si a Boan.

88.

Geh Bunkadi, Beankadi,
Zahl mar a Biar,
Ja had's g'sagd, gschwind is gwest,
Awa dan hads as niar.

89.

Hui, Herassasa!
Sagd da Kapuzina:
Kan di nid absolvir'n,
Muaßd s'Dearndarl bringa.

90.

Main Herz is von Silba,
Das dain is von Gold,
Und dain Aufrichdikaid
Had da Deixl schon g'hold.

91.

Wan häd ears dön g'hold,
Und wan häd ears dön weg,
In Suma bain Schnid
Is a fuardgflog'n damid.

92.

Wan a Ziddarn schen klingd,
Und a Dearndarl schen singd,
Und a Ziddern schen helld,
Is's a Fraid auf da Weld.

93.

Hausdürrieg'l, Staldürrieg'l
Main Madl is a Daixlsnig'l,
Gifd und Gal staigd ma auf,
Machst a Mal auf?

94.

In Hoanfeld is Kirchtach,
Da gehd's lusti zua,
A fünfazwanz'g Bidsch'n
Tringt g'wiß jeda Bua.

95.

A Ziddern, a Gaig'n,
A schwarzaugadi Diarn,
Da wiar i nid satt d'ran,
Da hab i koan Gnüag'n.

96.

Du Dearndarl hast gherd,
s'Is dain Fensta vafrerd,
Kan nid aini zu diar,
Geh kim aussa zu miar.

97.

s'Gamsschiaß'n gfraid mi nid,
s'Is nur a Gstanz,
Schiaß liawa a waißfuaßad's
Dearndarl bain Danz.

98.

Hoch drobnad in Wald
Wahd a höllischa Wind,
Wiar froh is da Bua, der
Zun Dearndarl hiazd kimd.

99.

Geh Dearndarl steh auf,
Mach ma's Fenstarl gschwind auf,
Laß hoamli mi 'nain,
Den laud därfads nid sain.

100.

I hals hald main Dearndarl,
Und bussal's a gnua,
Und d'Engarln in Himm'l,
Dö lachan dazua.



nach oben