weiter

Quelle:

Kaltenbrunner Karl Adam
Österreichische Feldlerchen
Lieder und Gesänge
in obderennsischer Mundart

Nürnberg 1857
v. Ebner'sche Buchhandlung (Verlags-Konto)
(Wien bei Tendler & Comp.)

So lang als 's nu Leut gibt In 'n Lándl herobn, So lang wird má singá, — Und 's singá is 'z lobn. Der Mensch bei án Liedl, Der denkt  auf nix schlecht's, Und so moanet' i, wár' áh Á Liadl was recht's.

Vom Autor gibt es ein großes Idiotikon oder Wörterbuch  hier

I. Lieder und Gesänge 1
Österreichisch! Lerche und Dichter D' Muettersprach' 's Wölkerl D' Fenster vo der Seel Lieb' und Freundschaft Kreuz und Kreuzl	D' Nacht hat Augn! Abá und auffi! 's guet Winkerl 's Schnaderhüpf'l D' Leut und d' Natur Tánzl	Aufg'rámt! 's schwáre Kreuz 's Zwidrige und 's Liebe Nöst und Weiberl Mein Davidl 's Oanbámel

Österreichisch! Frisch außá, wie 's drin is! Nöt kriech', auf 'n Bauch, Ins Gsicht schaun und d' Hand göbn, Is Österreicher-Brauch. Frisch wöggá von 'n Herzen! Denn g'moant is 's ja guet; wár' koan rechtschaffers Bluet, Wer nöt áso tuet. Frisch außá von 'n Herzen! 's findt wieder den Wög; Und der ehrli Gedanká Geht über den Stög. G'rad wög vo der Löber, Nöt g'wichst und verdráht! Wár' koan Österreicher- Bluet, Wann má öbbá so tát'! Lerche und Dichter Wann 's auf der Wies Draußt áber is, Wann 's Lercherl kimmt Und 's Gsang anstimmt: Wern d' Felder grean, Tán d' Bleameln bleahn, Und d' Winter-Keierei Is Gottseidank, ámal verbei! Á Lercherl schier Is 's Herz in mir; Oft warm drin wird's, — Glei Früehling gspürt's! Da leint's glei auf, Und juhetzt drauf; Es singt, und floigt in d' Höh, Als tát' herunt koan Stich mehr weh. D' Muettersprach' Traunviertlerisch röd'n — Wie 's má kimmt — is mein Sach'! Á jeds hat am Liebern Dö allererst' Sprach'. Der Vogl hat 'n Schnabl, Daß er singt, wier á wachst, Und der Mensch hat sein Sprach', Dast ás nettá so machst! Alls sag' i viel leichter Von Á bis zun Zöt, Wann i g'rad áso röd', Wie mein Müetterl hat g'rödt. I lös' wohl áh d' Gschrift, — Aber, Manner! mi ziemt, Daß dö Sprach' nöt recht mitten Von Herz'n außá kimmt? Drum mit Leuten, dö gspreizt sán Und dö i nöt kenn', Röd' i herrisch, dámit i Má 's Mäul nöt verbrenn'. Aber d' Leut, dö má gfall'n, Röd' i an mit der Sprach', Dö má kimmt, wann i 's Herz Für mein Hoamát aufmach'. Und verstunden s' mi nöt, — Wir' i dößtwögn nöt schrein, Denn das müesset'n spottschlechte Österreicher sein! 's Wölkerl Du Wölkerl, so weiß Wier á Bláttel Papier! I möcht' was drauf schreiben — An mein'n Schatz was vo mir. I kan nöt zu ihr, Weil i z' weit von ihr bi: Aver du obmát, Wölkerl, Du kimmst nu heunt hi! Laß dá schlaun'n, und wannst hikimmst, So grüeß' má 's recht schön! Ja, kunnt' i statts deiner So botenweis gehn! Du hast ás weit leichter: Du brauchst nix zun zöhr'n, Hast schön Zeit zu dein'n Roasen, Und kan dá 's Neamd wöhr'n! D' Fenster vo der Seel O Dirndl, du mein Herzensschatz, Mit Äugerl frisch und braun, Laß mi all Tag á Viertelstund' In deine Äugerl schaun! Wann 's Aug der Seel ihr Fenster is, Von unsern Herrgott gmacht, So mueß dein Seel was herzigs sein, Weil i 's so gern betracht'. Und wann 's áh nöt so blüeh'lweiß Á wie án Engel is: Du hast do' drin von Himmel was, Á saubers Stückerl gwiß. Denn — schaust mi an so lieb und guet, Da springt má 's Herz vor Freud, Und i vergiß auf 's Jammertal Und auf dö zwidern Leut. Wie sollt i nöt, so langs d' ás leidst, In deine Fensterl schaun? Und 's liebe All's, was außá guckt, Wer kennt 's, wie i, so gnaun? Und schau i eini nu so tief, — Du greinst nöt dößwögn — gel? Drum, Dirndl, laß mi eini schaun, Bis abi auf dein Seel! Drum, Dirndl, du mein Herzensschatz, Mit Äugerl frisch und braun, Laß mi all Tag á Viertelstund' In dö zwoá Fensterl schaun! Lieb' und Freundschaft Zwoa Leut, dö si gernham, Dö bußelnt ánand; Es ist recht bei án Párl, Bei M a n n e r n — á Schand! Án 'n Mann, den má mag, Dö recht Händt zun án Schlag, Und koan Wort nöt dázue, — Es is überigs gnue! Denn 's Pöttschaft von Bußeln Wird ehender z' gehn, Als das Wort, was s' nöt gsagt ham, Dö Manner, dö zween. Kreuz und Kreuzl Was i ghabt han, geht z' schári, Verwixt han i Alls, Bis auf — 's silberá Kreuz'l Von 'n Müederl ihrn Hals. Á Kreuz und á Kreuz'l Is Allsant von ihr! Das oan auf 'n Freithof, Das ander bei mir. Wann das oan ámal z'fallt, Han i dös, und sunst nix! Lieber 's Hemád, dás lötzt, — Eh i dös da verwix'! D' Nacht hat Augn! Ja, d' Nacht hat Aug'n! Sie siecht Gar guet, was Alles gschiecht; Denn d' Liechter, dö sie brennt, Sán d' Stern in 'n Firmáment. Was d' Lieb si anvertraut, — Wann áh sunst Neamd zueschaut, — Sie hört's und siecht's gar glei, Do' is sie stát dábei. Is awer wo was gschehgn, Und moanen s', Neamd hät 's gsehgn — Da hat sie Aug'n wie d' Katz', Sie siecht's, und dös verrats. Sie sagt 's 'n Tag, und der Bringt bal 'n Schölm dáher, Und wascht 'n mit der Laugn! Ja, Leuteln! d' Nacht hat Aug'n! Abá und auffi! Han z'náchst ámal gspürt, Wie má 's Herz tuet so weh, — I bin auf und dávon, Und bi gstiehn auf á Höh. Auf án entrische Höh, Daß má leichter sollt wern, Wie án' auskemmán Vögerl Is, wisset' i gern! Han mi higsötzt am Berg, Unter Fölsen und Stoan, Von 'n Leuten, den zwidern, Weit wög, ganz alloan. Han auf d' Welt abá gschaut Und so g'roat über d' Narrn, — Und da bin i statts aufgrámt Nu d á m i s c h e r worn! — — *   *   * Und schwár is má wieder Mein Herz worn ámal, — Wier á Holz, á vermorscht's, Wár' 's má z'brochá schon bal. Bi wieder dávon Und in 'n Wald, wie á Reh, — Wie á Gáms, derá wohl is Ganz drobm auf der Höh. Bi gsössen am Kogel In dö sinkáde Nacht, — Und dös Weib, das kohlschwarz, Hat mi gscheidter ge gmacht. Bi gsössen am Kogel In dö sinkáde Nacht, 's Firmáment und sein Fungetz'n Han i betracht'. Han zun Haus auffi gschaut Mit 'n Sternschindeldach, Mit der Mon'scheibm als Schild, Nöbn á Milchstraß'nbach. Auf 'n H e r r n han i denkt, Der in 'n Haus drin logiert, Wo má nimmer nix zahlt, Wann má Inwohner wird. Han vergössen auf d' Welt da, Auf Arbát und Plag, Keierei und Verdruß, Und dö Hándel all Tag! Han sauber vergössen Auf Kränknuß und Zorn, — In mein 'n Herzen is 's stát Wie bei 'n Mößlösen worn. 's guet Winkerl I möcht wo á Winkerl, Ganz hint in 'n Gebirg, Wo i nix vo der Welt Nimmer hör, nimmer sieg, Meine Kinder beinander, Eahn Muetter dázue, Á Paar Leut, dö má gernhat, — Wár aften schon gnue. Á Winkerl, á hoamligs, Von Berign á Zaun, Über den má so leicht nöt Kunnt überi schaun. Á Häuserl, was z' löbn, Und á Rueh nach mein'n Willn, — Nacher mögts enk, ös Narrn draußt, Ánander dermülln! 's Schnaderhüpf'l Á Vögerl, á kloans, Auf án Tannáwipf'l: Und es is nix so liab Auf án Tannáwipf'l: Und es is nix solieb 's wier á Schnaderhüpf'l! Á vierzeiligs Gsángel, Dös mörkt má si bald, Und má singt si so leicht Wier á Zeisel in 'n Wald. Mi gfreut vo mein Schatz Schon á Tüechelzipf'l, Und so macht mi glei aufg'rámt Oan Schnaderhüpf'l. Wann i 's Kopftüechel siech, Is áh 's Dirndl bald da, Und á Liedl, was anhöbt, Ziegt s' duzátweis ná. Wann der Ähnl-Mon scheint Mit 'n goldren Kipf'l, Nachher kemmán s' erst recht Dáher, d' Schnaderhüpf'l. Á Gsángl auf d' Nacht Is mein Löbn und mein Freud! Mit án dámischen Juhetzer Hellert 's auf d' Weit. Oft schmöckt Ám in 'n Glas'l Das kleanste Schlüpf'l, Is koan Liedl so leicht 's wier á Schnaderhüpf'l! Was kloan is, is herzi, Was wahr is, is kurz, Und mi hárbet' 's nöt z' weng, Wanns má 's a'streiten wurdts! Á Windfáhnl auf 's Dach Und auf 's Jot á Tüpf'l! Is koan Lustbarkeit ganz Ohne Schnaderhüpf'l! Á Haus ohne Gsang, Wier á Mensch ohne Sprach, Und á Geign ohne Klang — Wár á traurige Sach! Von 'n Tal auf 'n Berg Bis in höchsten Gipf'l Geht der Steig vo án Jáger Und 's Schnaderhüpf'l. Wo d' Leut um koan Lied Und koan Gsángl mehr fragn, Da is d' Welt schon in Art — Und mit Bröttern verschlagn! D' Leut und d' Natur Hamt d' Leut auf der Welt Deant á nárrische Weis! Wöllnt allweil was anders, Und allweil was Neus. Das Alt wird eahn z'wider, Woaß Koaner zwögn wö? Schier all Tag soll 's was Neus göbn, Expressi für sö. Und d' Natur, wann má s' anschaut, Tuet allweil dassell, Und was s' alleweil hergibt, Das taugt dá schon, gel? Macht 'n Winter und 's Fruehjahr, Nach 'n weißig'n fárbt s' grean, — Will sein Láber der Bám hám Und nacher bráv bleahn. Macht Summer und Hörist, Tuet einführn, macht Most, — Denn sie tuet, was si g'hört: Gibt 'n Trunk zu der Kost. Drauf wieder wie vörd, Wieder weiß und aft grean, Nach ánander so d' Tág, Wie má 's gwöhnt is von eahn. Sán dö nämlign allweil, Wie in 'n Himmel obn d' Stern; Eiá! kan nix verruckt Und nix umgmodelt wern! Und áso hat 's d' Natur Schon viel tausendmal gmacht, Und nu nie hat s' án anderne Modi aufbracht. Dö führt enk nix Neu's auf! Und dennást — was s' tuet, Is 's nöt allemal schön? Und nöt alleweil guet? Aber g'sötzterweis — 's wurd Statt 'n Grean'n ámal gráb? Und daß s' statt 'n Kerndl Öbn Schotterstoan gáb? Wie wár denn dö Neuikeit? G'fallet 's dá, hán? Du wurdst di bedanká, Du sagetst gwiß nán! Tánzl               1. Auf bei'n Zeug! Juh! Dirndl, du mentisch du! Umádum guet beinand, Brauchetst koan Feirtágwand! Mensch, wie von 'n Dráxler gmacht, Daß má mein Herz schier lacht!         Heráxtáx!         Saubers Gwáchs! Dirndl, schön frisch und gsund, Gsicht und Arm kugelrund, Kerschen in Augnen drin, — Liegst má schon lang in Sinn! Kürni wie frische Nuß, Halst was aus, recht á Ruß!         Pássen zsamm i und du!         Juh-i-u-hu!               2. Was gsund is, is kerni, Das Gfäulte is len, Wier á Ápferl bist kürni, Dös brock i má gen.               3. Wier á Bám ohne Láb Is á Man ohne Haar: Aber 's einwendi Löbn, juhe! Is nu nöt gar!               4. Der Dokter hat bádert, Es greift gar nux an; — Hietz is 's Dirndl kernfrisch, Weil i 's aufg'rügelt han!               5. Mein Mentsch is á Heugeign Und i bi á Knotz, Und drum brauch' i á Loaterl Bis auffi zun Fotz.               6. Hobelbänk, Hoanzelbänk! Wann i auf 's Dirndl denk, Schmöckt má nöt d' Hobelbänk — Dös sag i enk!               7. Án auskemmás Vögerl, Á Wásserl in 'n Wald, Und á Lieb, nu so hoamli, — Wird aufmáhri bald! Aufg'rámt! Bi á Bue, den was gfreut, Alleweil bei der Schneid! Wár á nárrischer Kunt, Moanen d' Leut da herunt.         Was i schuldi bi, zahl i,         Der Kellnerin gfall i, I wisset áh Neam, Der mi tauchet von eahm. Und i rahtet 's áh Koan'n, Daß er anhöbt mit Oan'n, Der vor seiner nöt láft, Und eahm 's zoagt, wie má ráft!         Wohl der Dámische hoaß' i,         Aber, Kerln, dös woáß' i, Koan Fleischhackerknecht, Der mi zsammrámá möcht'! Is koan Bue nöt auf d' Weit, Der mi bodnt, — da hat 's Zeit! Is koan Bue nöt in 'n Gäu, Der mi hitanzt bei'n Bräu!         Bei der Geign, bei der Zithern,         Alls rührt si in 'n Gliedern! Koan Boanl in mir, Wo i müed ámal wir'! Und i han mein'n Verstand, Was má braucht auf 'n Land; Gögn án Schreiber in 'n Gschloß Bin i áh nu koan Roß.         Und beinand bin i sauber,         Schau' nöt aus wier á Rauber, Bin i krehá und gsund, Kan á Weib ham auf d' Stund! Is koan Mentscherl so stolz, Daß ihr Herz wár' von Holz! Is koan Töchterl so schwár, Was nöt z' höbn für mi wár'!         Aber — lödi und frei sein,         Und übrall dábei sein, — So lang als es tuet Nu, — dös gfallt már Alls z' guet! Bi á kernfrischer Bue, Steh gern auf in der Frueh, Und i arbát bei'n Tag, Was i mueß, was i mag.         Was i ham mueß, dös gwing' i,         Drum pfeif i und sing' i, Wo i geh', wo i steh: Hui-ju! hui- je! 's schwáre Kreuz Der Buechmoar hat gheirát — V i e l  G e l d, wie d' Leut sagn; Ham nu nie von 'rá Hohzát So á B'schoádössen tragn. Bráv Geld hat er freili! Sechzg Tagwer', vier Roß, Á lauts Vieh in sein'n Stall Und án Hof wie á Gschloß. Allsandá wár' recht, — Wár nár oans nöt dábei, — Und dös is nöt zun ändern, — 'n Buechmoar sein W e i. Hietzt lost er und seufzt er, Und kratzt si in Kopf; Wann 's koan Schand wár', er schüblet Si selber 'n Schopf. Oft schaut er und luegt er Fuchsteufelswild drein, Aber 'd nutzt nix! — Sie laßt 'n Halt tümmeln und schrein. Und wann si 'n Buechmoar Sein Gall á weng sötzt, Aft höbt sie an, und knauft, Bis er — marb wird auf d' Lötzt. Aft kunirt s' 'n erst recht! Und is ehnder koan Rueh, Bis er auf und dávon geht Und zruckschreit: "rö' zue!" Gögn á Weib, so hautlötz, Is nöt aufz'kemmá mehr; Geht der Teufel ja  s e l m Bei so Weibern in d' Lehr Und 's is öbn á Wurzn, Is zaunmarterdürr, Aber z' tragn hat er dennást Schwármächti an ihr. Ja, sein Kreuz, dös is schwár! Und er kan 's áh Neamd klagn, Denn er hat si 's selm aufglad'nt, Drum mueß er 's selm tragn. Er kan's nöt verbrenná, Nöt z'schnei'n und nöt z'spalln; Na, dö wurd' 'n nöt zuericht'n, z'schándeln und z'kralln! Wann áh d' Taler drin stöckán, I káf eahm 's nöt á, Und so wohlf'l als er 's hergáb', Mi lust't nöt derná. Es wurd'n má wohl d' Taler Recht anständi sein: Do' — für d' Zuewag, dö dranhängt, Bedank i mi fein! 's Zwidrige und 's Liebe Jahr aus, Jahr ein sán d' Spatzen da, Und schreint Jahr ein, Jahr aus; Und d' Krohn und d' Alstern machán 's ná', Und krágetzn bei'n Haus. Und 's Dröscherl, was so herzi singt, Is z'weitest draußt in'n Wald; Und wann mi áh mein Wög hi bringt, So mueß i hoam viel z' bald. Mir kemmán d' Alstern, d' Spatz'n und d' Krohn Wie alte Moahmen füer, — Und 's Dröscherl is, in'n Wald hidan, Mein Schatz, weit wög vo mir. Is 's nöt á Kreuz? — Dös sag' i ja! Just umkehrt wár 's á Freud: Wár lieber sie, mein Dirndel da, Und d' Moahmen auf der Weit! Nöst und Weiberl Der Fink hat sein Nösterl Auf 's Nástel hibaut, Und er hat si áh glei Um á Weiberl umgschaut. Wie leicht hat 's á Vögerl! Án ieder kriegt oans: Und i wár do' á Vog'l, — Han dennáft nu koans! Hietz trag' i má z'samm Vo der Strá, was i krieg', Daß i nachher mit Oaner Ins Nöst eini flieg'! Mein Davidl Han g'lösen ámal In der biblischen Gschicht Von án jüdischen Küni Mit án gremáßign Gsicht. Hät reiten und fahrn Und verjuxen künná, Und koan Angst hät 'n plagt Vowögn 's abirinná, — Hät z' össen und z' trinká ghabt, Gschlösser und Leut, Hät nöt z' arbetn braucht — Hat 'n dennást nix gfreut! Wann 's án Küni so geht, Is 's bei mir koan Wunder, Daß mi 's Löbn oft nöt freut Und der ganze Plunder. Der Küni, der lueged', Lost hi auf oan'n Flöck, Und i glaub, wann má 'n beutlet, Má brácht 'n nöt wög. Und weil er so hárb is, Ham d' Hofherren gsagt: "Má wissen á Büebel, Was d' Hárpfen schön schladt." "So bringts mir den Buebn!" Hat der Küni befohln; Eahná Zwoanzg glei sán g'rennt, Daß s' 'n finden und holn. Und 's Büebl is kemmá. — Ham 's Dávidl gnennt, — Und zán spieln hat er anghöbt, — Du Mordsákerlent! Der Küni vergißt Auf sein Gall und sein'n Zorn, — Und sein Gsicht, das verdrießli, Is sunnscheini worn. Und so oft über 's Löberl 'n Küni was rennt, Kimmt der Leibhárpfenist, Der sein Schuldikeit kennt. *   *   * I bi wie der Küni Oft fuchsteufelswild, — Do' — i han áh m e i n  D á v i d l, Was má so spielt. I brauch' nöt erst z' schická, Han 's allweil dáhoám, — Denn mein Dávid is d' Z i t h e r n, Vo der Hárpfen á Moáhm. Es liegt nix in 'n Herzen So tief und so schwár, Was nöt d' Zithern derglängt, Was zán austreibn nöt wár'. I kan nár öbn klempern, — Is dennichá gnue: Denn i  s e l m  bi der K ü n i, Und d' Z i t h e r n  d e r  B u e. 's Oanbámel* In 'n Oanbámel fahr' i Dahi übern 'n See, Und so lang i áh rueder, Koan Glied tuet má weh. I fahr auf mein Oertel, Ös kennts es wohl eh: Is 'n Rosel ihrn Vatern Sein Häusel bei 'n See. Da gát 's koan grobs Wötter, Koan Finstern für mi, Wann i drin in mein'n oanspánnign Seelntränkerl bi. Oft is már in'n Hinfahrn So lusti in'n Sinn, Ja, ás wár die ganz Welt I' dem Nußschálerl drin! Oft bin i á Kind, Voller Freud und Vergnüegn, Da is 's Schifferl mein Hei'l Der See tuet mi wiegn. Oft kimmt 's má so für Á wie 's Herz vo mein'n Schatz: Hat koan Anderner drinnet Nöbn meiner án Platz. Und begehret' deant Oaner Nöbn meiner án Platz — Na, so keiet' i 'n außi, Und 's lachet mein Schatz. Und floiget er außi, So wisset er gwiß: Was bei uns da vo Rechtswögn Á Seelntränkerl is. *Oanbámel, Einbäumel, scherzweise auch "Seelentränkerl" genannt, die aus Einem Baumstamme gezimmerten, kleinen Schiffchen der Fischer auf den oberösterreichischen Seen.