weiter

zum Wörterbuch
 

III. Riedig's und Räudig's III. (Heißt so viel wie: Alles durcheinander)
Jägerlust Ersparnis Schwer und leicht Schenkenfleiß Vielfältige Bewegung	Ausrede Der Zitherschläger Spielmannslust Abhilfe Schneescheuche	Lebesinn Verlust Vor der Dorfkirche Offenheit Ermunterung	In der Fremde Irrung Unterschied Empfang Zum Neujahr

Jägerlust

Heunt' schieß' ih nit, heunt' laß' ih
All'm Wild án'n Fried';
Und wann's má-r-auf d' Nasen steigt,
Heunt' g'spür' ih's nit.

Heunt' hat mih mein Derndál bußt,
Heunt' gib' ih's hoch:
Heunt' habt's engán Feita,
Ös Hirscháln, seid's froh!

Ersparnis

Zur Weinles' da lad't's eng
Hübsch Stadtleut' nur ein:
Denn fressen s' eng d' Weinbá,
So brauchán s' koa'n Wein.

Schwer und leicht

Ehwenn der Weinstock g'haut wird,
Ehwenn á kimmt in d' Blüh',
Ehwenn dran d' Beerl'n rund wer'n,
Was braucht dös für á Müh'!

Wie bet't má, dáß koan Reif kimmt,
Und dáß koan Schauá fallt';
Ja herg'stellt wird á mühsam,
Vásoffá-r-is á bald.

Schenkenfleiß

Krüg'l abi, Krüg'l auffi,
Wein'l eini in's Mál;
Zum Einschenken und Austrinken
Bin ih nit z' fál!

Vielfältige Bewegung

Gangá bin ih in'n Kellá,
G'stand'n bin ih bei'm Faß;
G'hockerlt bin ih neb'n 'n Gantá,
Toarkelt bin ih mi'm Glas.

G'fall'n bin ih bei dá Tür drobmád,
Kugelt bin ih übá d' Stieg'n;
G'leg'n bin ih drunt' im Kellá wiedá,
Auffi hab'n s' mih müss'n zieg'n.

Ausrede

Au'm Berg liegt dá Nebel,
Im Tal kummt á z'samm,
Und zweg'n we sollt denn ih just
Koan'n Nebel nit hab'n?

Der Zitherschläger

Zidán schlag'n, dös is
Mein' oanzigi Freud'!
Holla! dös hebt Oan'm d' Füß',
Dös macht á Schneid'!

Wann má mi'm Dám aufdruckt,
Zidát dá Ton:
Dös geht in's tiefsti March,
's is á Pássion!

D' Mádeln schau'n käwi drein,
D' Alten schau'n weg;
Zidán schlag'n, Zidán schlag'n,
Wann s' nit gleih "Ja" woll'n sag'n,
Zidán schlag'n, Zidán schlag'n —
Aft geht's vom Fleck.

Spielmannslust

Á lustigá Spielmann sein,
Is á schön's Brod;
Wann's Oan'm nit z'sammgeht,
Vágeign't má sein' Not.

Wann má-r-aft sammeln geht,
Und 's fallt was aus:
Bringt má-r-á Geld, so z'sag'n,
Spielád in's Haus.

Wár'n's áh zwölf Kreuzá nur,
Ih lach' dázua:
Für á Maß Heuringá
Is 's gleihwohl g'nua.

Abhilfe

Dös Unglück! koan' Gans heunt',
Und is doh Mártini! —
D' Frau Máhm' kinnt' uns helfá!
Sag s' nur: "Da bin ih!"

Schneescheuche

Herunt' is 's noh warm und grean,
Wo-n-ih nur geh';
Aber drob'n auf der Alm
Liegt schon schuachhochá Schnee.

Auf der Alm liegt á gut,
Wann er uns nur nix tut!
Schreit's nur und dudelt's laut,
Dáß á nit her sih traut.

Lebesinn

Mocken und Bocken
Bringt Oan'm koan Glück;
Kummt áh á Brocken,
Ih denk' halt: "Schlick'!"

Hánti und gránti
Macht Oan'n nit fett:
Allás geht eini,
Wann má sih nöt't.

Verlust

Schau nur, wie's Schneeberl
An d' Fensterscheib'n rauscht,
Und horch' nur, wie 's Feuerl
Im Ofen drinn plauscht.

Was plauscht denn im Feuerl,
Was grant in dá Glut?
Mir ziemt, 's is mein ágná
Kreuzlustigá Mut.

Mein Mut is vábrunná,
Mein' Freud is váwáht,
Und mein mutwillig's Herzerl
Vábráselt sih stád.

Vor der Dorfkirche

Am Kirchtor da hat mih
Mein Muadá-r-oft g'stillt;
Zwoa Birnbám vur'm Pfarrhof,
Da hab'n má-r-uns g'spielt;

Á Turm, auf dem hab'n s' má
Mein 'm Vádan ausg'läut't;
Á Kreuz, um was d' Herrschaft
Mein' Muadá beneid't;

Á Platz in d´a Mitten
Für mih nach dá Hand,
Und so hab' ih halt, was ih brauch',
Allás beinand.

Offenheit

Án Östreichá red't, wie-r-ás
Einwendi denkt,
Und d' Wahrheit dö hat á
Koan'm Menschen noh g'schenkt.

Ermunterung

D' Wachteln dö schlag'n vur'm Schnid:
"Quá quá wá, find'st mih nit!"
Is aber 's Feld ag'máht,
Nachá san s' stad.

Weil má halt jung sán noh,
Schrei'n má-r-und sán má froh;
Is ánmal d' Jug'nd váwáht,
Wer'n má so stad.

In der Fremde

Blab is dá Himmel da,
Grean is da d' Au;
Abá geg'n mein lieb's Östreich
Is's doh koan kühl's Tau.

Irrung

Also dös is dá Koasá?
Dös hätt' ih nit g'moant:
Hab' glaub't, 's is mein Vadá,
Hätt' bald án'n Fleck g'woant.

Unterschied

Wann má-r-'n Amtmann grüßt,
Steift á sein'n Kropf;
Wann má-r-'n Koasá grüßt,
Nickt á mi'm Kopf.

Empfang

Heunt' kummt unser Amtmann
Mit seiná Mádám!
Malt's d' Hüttná mit Stritzelgelb,
D' Fenster mit Láhm.

Macht's Musi mi'm Schürhag'n,
Laßt's d' Schwein' aus'm Stall;
Denn wann's nit stád abágáng',
Hätt' er á Gall'.

Er is gar á brává Mann,
Deckt uns fein zua,
Und sidá má'n dadá hab'n,
Hab'n má-r-erst g'nua.

Zum Neujahr

Zweg'n we denn á neug's Jahr,
Was wár' denn dran neuch?
An Glück war'n má-r-eh' ja
Im alten schon reich.

Was Alt's is dá Frieden,
Was will má denn mehr?
Da Koasá war áh da,
Dá seel'nguti Herr.

Was Alt's is dö Treu',
Und dá Sinn vollá B'stand,
Und was Alt's is dös godg'seg'nti,
Prächtigi Land.

Drum wüßt' ih mein'n Glückwunsch
Nit höchá mehr z'treib'n,
Als: dáß 's möcht bei'm Alten
Im neuch'n Jahr bleib'n!