|
Warnung
Haltábua, Haltábua,
Halt' dein' Kuah, halt dein' Kuah!
Páßt oaná schon.
Haltábua, Haltábua,
Halt' 's Derndál áh dazua!
Is á Speránzel da,
Jagt dá 's sunst a.
Wechsel
Á kloan's, á kurz Derndál
War z'ert das meini:
Á kloan's schlupft halt gar leicht
In's Herzerl eini.
Jetzt liegt má-r-á Großi,
Á Langi im Sinn,
Und so groß als s' áh is,
So is s' doh wieder drinn.
Vergleich
D'Váliebt'n ziel'n auffi
Au'm Monschein als Scheib'n,
Und d' Sterndáln sán d' Bolz',
Dö dáneb'n stecken bleib'n.
Ähnlichkeit
Was schaust denn auf's Fürtá?
Schau' lieber auf mih:
Á Fetz'n is 's Fürtá,
Á Lumperl bin ih.
Der Weinhüter
Koan Weinhütá bin ih nit,
Hab's áh nit Not:
Hab' so schon mein'n Sábel,
Denn nimmt má koan God.
Koan Weinhütá bin ih nit,
Brauch' áh koan Horn:
Hab' zwoa von mein'm Wei,
Und hab' koan's noh valor'n.
Der Rekrut
Jetzt soll ih mih stell'n,
Und ietz wir' ih Rekrut;
Von Pick auf wird ausg'spielt,
Und Trumpf is Atutt.
Zwá Farb'n auf'n Röckel,
Zwá Derndáln im Sinn,
Und zwá Kreuzer im Sack,
Und d' ganz' Welt als mein G'winn.
Ih leb' für mein Koasá,
Und schieß' für erm áh,
Und ih wollt' ih wár' doppelt,
So stellát' ih zwá.
Á Schneid' hat mein Sábel,
Und án Schuß hat mein G'wihr,
Und á Schneid und án'n Schuß
Hab' áh ih, wie-r-ih g'spür.
Der Reiter
Schau, Derndál, án'n Reidá
Fopp' nit, wánn 's d' áh kinnt'st;
Er reit't dá sunst weidá,
Aft schau, wo 's d' 'n find'st.
Heilung
Derndál, mein Herz is krank,
Derndál, sei g'scheidt;
Wann's d' mih kurier'n willst,
Is allweil noh Zeit.
Brauchst zu koan'n Badá z'geh'n,
Kannst ás álloan:
Göscherl auf Göscherl,
Ih moan', dös wird's toan.
Dö Badá sán Schlánkeln,
Dö Badá sán Flögeln;
Deini brinnháßen Bußerln
Sán d' besten Egeln.
Abhilfe
Am Sunta da woan' ih,
Ih wáß, was dös macht:
Und ih hab' halt schon richti
Am Freita z'viel g'lacht.
Wann Oaner am Freita lacht,
Dös is koan G'schick:
Da woant d' Muadá Gottás,
Dös bringt Oan'm koan Glück.
Und ietzt woan' ih am Freita,
Soviel, als ih kann,
Und lach' má-r-am Sunta
'b Bugel voll an.
Zweite Liebe
Nur oanmal váliebt sein,
Warum denn nit gar?
Bin's alli Jahr' zehnmal,
Bin zehnmal á Narr.
So lang ih á Narr bin,
So lang is's á Freud':
Für's Leb'n is's schon z'spat,
Ih wir' todter erst g'scheidt.
Vorwurf
"Wann á Bám zwámal blüht,
Zwámal im Jahr,
Is er á-n-oarmá Narr,
Is's mit erm gar.
Wann á Bua zwámal liebt,
Zwámal im Leb'n,
Wer soll erm 's dritti Mal
Noh á Herz geb'n?!" —
's ersti Mal war's nit recht,
's zweiti Mal war's nit echt;
Alli gut'n Ding' sán drei: —
Du wirst mein Wei!
Das Blinzeln
Schaut's nur, wie d' Sterndáln
So zimperli tun,
Und mit'n Augerln koan'n
Augáblick ruh'n!
Is dös á G'schámigkeit:
Dös tuat koan Mann!
D' Jüngferln dö blinzeln so,
Schaut má s' z'stark an.
Destweg'n behaupt' ih halt
Alláweil noh:
D' Sterndáln sán Jüngferln,
Drum blinzeln s' á so.
Sternschnuppen
Dö Sterndáln sán Jüngferln,
Sö fall'n bei dá Nacht: —
Mein Derndál, mein Jüngferl,
Ih rat' dá's, gib Ach!
Dö Sterndáln sán Jüngferln,
Schau, dáß d' dih nit irrst,
Und schau, dáß d' nit áh so
Á Sternschneutz'n wirst.
Gegensatz
Mein Herz, wie's noh voll war,
War g'ring zum Vástrá'n;
Durch á Nábinger-Loch
Hätt's dá Wind kinná wáh'n.
Jetzt is má mein Herzerl
Schon d' längsti Weil' lár,
Und do is 's má-r-imm'r-á-mal
Gleihwöhlst so schwár!
Vergleich
Von auswendi toll,
Und von einwendi trüb,
Von auß'n dá Mutwill'n,
Von einwendi d' Lieb'.
Ih bin wie dö Fäustling',
Dö's Derndál anhat:
Von einwendi zodád,
Von auswendi glatt.
Erklärung
Dös Foppen, dös Heanzen,
Dös Toan hab' ih gnua;
Und anloahná laßt sih
Koan ehrlichá Bua.
Wann 's d' mih willst, so will mih,
Und willst nit, so sag's!
Koan'n bessern Bub'n kriegst nit;
Ih bin wie-r-á Wachs.
Ih bin wie-r-á Wachs,
Abá 's Wachs hat koan'n B'stand:
Und wann's d' má halt gar z'háß machst,
Rinn' ih vánand'.
Seltene Ware
Derndál, au'm Ostámark
Kauf' ih dá-r-ein;
Ih moan', á treu's Herzerl
Wurd's ráresti sein!
Dö Treuheit is biklem,
Má zahlt's um koan Geld,
Und má kriegt's nur im Tausch,
Und áh da is 's oft g'fehlt.
Schätzung
Dein' Treuheit dö schlagst so hoch an,
Und hast halt noh denná koan'n Mann; —
Geh' b'halt' dá dein Treuheit, ih brauch' nix von dir:
Ih gib' koan Botschán'l dáfür.
Kritik
Geh', Flitscherl, geh' tu' nit so,
Tu' má's nit z' Trutz:
Bist d' Halbschád nix rár's,
Und zwá Viertel nix nutz.
Plan
Schau, Derndál, du bist adráht,
Schau Derndál, du bist fein:
Án'm Andán tás't dein Herz vágeb'n,
Und ih sollt' d' Ausred' sein!
Termin
"Zweg'n we bleibst denn aus;
Und zweg'n we kummst nit her?
Es is ja, als wár' ih
Dein Schatzerl nit mehr!"
Halb's hab' ih koan' Zeit,
Und halb's hab' ih koan' Schneid',
Und ih wir' schon au'm Dimmerlstag
Schau'n, ob ih mag.
Ausrede
Wann ih plausch' mit dö Andern,
Geh' — schau nit so schiach hin;
Ih vázähl' erná nur,
Wie goar treu ih dá bin.
Abschied
Fensterl, b'fürt God!
Fensterl, bleib' zua!
Wann Oaná klopft,
Is 's á-n andárá Bua.
Fensterl, ih geh', —
's is halt á so!
Hast mih glei schiarch betrog'n,
Hart g'schiecht má doh.
Rückblick
Derndál, wie hab'n's mir zwá
Nit ánmal trieb'n!
's Feuer is apfluscht,
Dá Rauck'n is blieb'n.
Derndál, was hab'n mir zwá
Uns nit All's g'sagt!
Gut, dáß dá Wind dö Wort'
Alli vátragt!
Wann má's ietzt lesát'n,
Was má-r oft g'red't,
Derndál, á bisserl rot
Wurd'st wohl, ih wett'.
|