weiter

Quelle:
Salzburgá Bauern-Gsángá

Wien 1847
Verlag Carl Haas'schen Buchhandlung
Gedruckt bei Carl Ueberreuter

Hinweis:
Es gibt vom Autor ein Wörterbuch.  hier

Bán üns áf dö Berögn, Is's 'n Nachtögalln z'kalt, Und váfliegt sö á oanö, So stiröbts gwiß bald. Drum hern má 'n Gimpöl San'n Pfif á Weng an Und lachánár aus, Weil ás goa so schen kann.

Salzburgá Bauern-Gsángá 1
Dá Sunnáwendkefá Dá Manschein Bi z'graoß Mein Schatzerl Mein Schensts und mein Bösts	's Wehload Má Lieb 's Obárenser Jahrbuch 1844 d' Schriftglehrten d' Lieb	Dá Niegnueg Dá Sunntag 's Reserl Mein bösten Kamáraden d' eisánö Pfoad

Dá Sunnáwendkefá Dá Sunnáwendkefá Wie guet hat á's nöt, Sein Haus is á Feld Und á Roasen sein Bött. Sein Wirtshaus háno d'Bleámöln, Bá dö kehrt er zue, As wird iehm doll eingschenkt Is's spat odá frue. Und hat ár án Hungár Is's á schan áfdöckt, Er findt áfn Blüehbom Olls das, was iehm schmöckt. Áf d'Nacht fliegt ár umá Und leucht't zwan á brunn, Bán Tag ligt á ruehlög Und schloft in dá Sunn; Und schloft in dá Sunn, Weil á Roasen hat gmacht Und umzochált is Mit sán Schatz in da Nácht. — Gel, das is á Löbn, Dáß dár 's Herz dázue lacht, Schlampampen bán Tag Und aft glanzen áf d'Nacht. — Und siegst ás, krad 's Glanzen Das bringt iehm sein Naot, Kimmt á stinkádö Nadár Und beißt'n maustaot. — Mein hán dert, zwögn was denn? Is 's öppá nöt guet, Wann Oans in dá Finstár Voaran leuchten tuet? Guet wár's, abá glaub már's — Ás is nixö z'sagn, — Ás gibt viel z'viel Vichár Dö 's Liecht nöt vátragn; Dö 's Liecht nöt vátragn Und áleidn goa nöt mögn, Geh frog nöt, zwögn was denn? Ás is — dávantwögn! Dá Manschein Dá Manschein, dá Manschein, Der is halt mein Freud, Da is má koan Wög Zár án Dierndl nöt z'weit. Dá Manschein, dá Manschein, Der zimt mi so schen, Dáß i ollö helln Nácht' Zár án Schatzerl mue gehn. Wann i nu so vádrossen Und taotschláchtög bin, So kimmt már bán Manschein Á nandárá Sinn; Wir áfgrámt und lustög, Mag singár und schrein Und kann mi von Herzen, Wie sünsten nie, freun; Mach Faxen und Schnáxen, Treib Gspoaß ollahánd, Und tát á glei schmiröbn Bán Menschern ollsand. Und Schneid han i námla, Gotts Himmöl und G'richt! Áß Oans mit mir Kerschen Hätts d'Kern glei in Gsicht. — Jetzt mechts ös halt wissen, I denk már's z'wengst gwiß, Zwöni nettá so rund bin Wanns manscheinög is? Nu lost's nár, i sag enks Wie's zuegeht das Ding, Dáß ollmal bán Manschein Má 's Herz wird so kring: "Wie má bußt, wie má druckt, Wie má schmiröbt und lacht, Han i glernt von án Dierndl In á manscheinögn Nacht." Drum buß i und druck i, Und schmiröb halt gewiß, Und lach in dá Nacht So bald's manscheinög is. Bi z'graoß I kennát á Dierndl, Das hätt' i so gern, Woaß's nöt was i göbát, Wann's mein künnát wern. Sein Gsicht is so lieb Wie dá Himmöl áf d'Nacht, Wann ár ausgschlofá hat Und just d'Guggerl áfmacht. Hat á Grüebei in Koi Und án Aug wier á Reh, Á Hoar á kohlschwarzs Und á Haut wie dá Schnee. Und aften sein Göscherl — Gottskreuzelement Derf goa nöt drandenká, — Sünst wássernt má d'Zähnd. Schan d'Kiná, dö kloan, Hánd bán iehm gern dábei, Und sobalds nár Oans lockt Schreit's in oan furt: Ei! Ei! Röckt d'Armerl in d'Heh Und zán Hupfá fangts an, Bis sös endlög á Mal Umán Hals dákriagn kann; Aft halst sös und bußt sös Und losts nimmá los, So lang ols bis's müed is Und schloft in sán Schoß. Wann i á so á Kind wár, Und sáß in ihrn Schoß! Was wollt i Olls toan, Abá hau — i bi z'groaß; Bi z'groaß, han á Boart Schiegár übá's ganz' Gsicht, Drum wurs mi nöt halsen, Weil á goar á so sticht. Mein Schatzerl Wie Moaröngs á Raosen, Dö just áffspringá tuet, So schön is mei Schatzerl Das lebfrischö Bluet. Wie dá wunálögst Gsang In á sternhoatern Nacht, So lieb is sán Röd Wanns már 'sFensterl áfmacht. Á Bußerl von iehm Is má mehr als mein Löbn, Ja i wur, wann is hätt', Schiegá tausend hergöbn. Wurds heágöbn, i woaß', Und i künnts á leicht toan, Denn á Schmatz vá mein Schatz Machát lembög án Stoan. Und so lang nöt dá Blitzstroah Nu d'Salzá vábrennt, Und so lang nöt dá Sunnbrand 'n Watzmann dárennt; So lang wir is gernhabn, Das woaß i so gwiß, Ols wie dá Vikárö Á Geistlögár is. Ás müet ná krad sein, Dáß s'mi bußen nöt mecht, Nu — aften stánd's freilá Mit'n Gernhabn schie schlecht, Weil 's Löbn már ausgáng, Wier á Gluet nöt lang glost, Dö Niemd mehr anwáchelt Und Niemd mehr anblost. Mein Schensts und mein Bösts Dös Schenst, was i kenn Áf dá Welt dá groaßen, Is á blawaugáts Mensch Und á Manát-Raosen. Dös Böst, was i kost't han, Wori Olls ließát stehn, Is á Dierndl á schnidögs Un án Oarschmalz recht len. Drum wunsch i már nix Ols á lögádö Henn, Gnueg Schmalz und gnueg Raosen Und á Weiberl mordschen. 's Wehload Du Bácherl, du gscháftögs, Geh, hab á weng stád, Schau siegst ás denn nöt Dái gern rödn mit dir tát. Dá Tag geht schon schlofá, Druckt 's Aug voleib zue Künnst ár á Weil rasten, Bist gláfá heunt gnue. I mecht, was mi druckt, Dár halt goa so gern sagn Und mecht dár mein Herzload, Mein Traurögkeit klagn. Denn vo dir woaß is gwiß, Dáß d' dö ja nöt vástöllst, Dáß d'ás Niemd ols 'n Sternán Und Bleamöln vázöhlst. Und d'Bleamöln, wirst sehá, Wies zuelosen wern, Wies d'Köpferl áfröckán So balds dávon hern; Dástauná werns námlá Und woaná werns schie, Á Záherl im Äugerl Werns haben in dá Früe; Á d'Sterná, dö liechten, Wernd blinzeln oll z'samm, Wern sö schneuzen oft mächtög Weils Zäherl koan haben. So wier in dein Schoß da Dá Ferá umschwimmt, Á Weil ünt áfn Bom bleibt, In d' Heh wiedá kimmt, Und 's Wásserl áfwöckt Wann's wie stád dá wöll wár, So ist's mit man Wehload In Herzen halt ár; Denn kám schátz i's gstillt Und roat's z'tiefst ahödruckt, Án Schnöblár und umdráhts Und aufá kimmts gruckt. Da wuerlts aft um Und g'schwillt an, dai woan, Jezund und jezund Wird 's Herz iehm gen z'kloan, Wird 's Herz iehm viel z'kloan Und mue zspringá gen glei — Nu meintwögn, wár á recht, So wárs dert vábei. Mit'n Wehload und Herzen Wárs goar und wárs aus, I kámm hintá d'Erden Und kriegát á Haus Doll omád in Freidhof, Wo Niemád mehr klogt, Wo 's Kreuz nár von Holz is Und 's Herz nimmá schlagt. I han — abá mein Gott, Du mierkst nöt áf mi, Und láfst áz wier ehntár So schleinög dáhi. Du gibst má koan G'her, Wie dö Anern ollsand, Drum bleib i áf ewög Mit'n Wehload bánand, Und klags mehr koan'n Menschen, Koan'n Bácherl, koan'n Stern, Ás wird wohl nu 's Wehload Mein böstá Freund wern. Má Lieb I lieb á schens Menscherl Und kann nöt zán iehm; Und deácht mue is gernhabn, Das glaubt öppá Niem! I lieb á schens Diernderl Und derf iehms nöt sagn; Und liebn tue is döstwögn, Bi gwiß zán beklagn! I lieb á schen Gsichterl, Zwoa Wángerl bluetroat; Und solls nix was anschaun, Das kränkt mi schie z'taot! I lieb á Paar Äugerl, Wie dá Himmöl so blab; Und kann mi nöt segn drin, Das bringt mi ins Grab! I lieb á zwen Lefzen, Wie Grallná so schen; Derfs obá nöt bußen, I künnt frei vágehn! I lieb — hau, was treib i? I tát enks gen bschreibn, Abá eyá báleibi, Daß loß i fein bleibn; Denn wann i enks bschreibn wollt, Wo náhm i 's Papier? Brácht nöt so viel zsammá In dá ganzen Revier. Ja, wann i á olls hätt, Das's gibt áf dá Welt, Und Födán so viel Ols wir Halmár in Feld, Und Dinggen so häuftög Wie Wassár in Mier, 's Wurn d'Födán und Dinggen, Má zweng und 's Papier. 's Obárenser Jahrbuch 1844 Zwoa Pfeifer in Wirtshaus Dö schaun sö schel an Undma findt in sein'n Handwer Gar oft so an Gspan.                       Kaltenbrunner. Gott grüeß enk, ös Manná Ván Oberensland, Heids häuftö bánaná Und gscheid ollösand. Á Bueh habts iezt gschriebn, Das üns námlá schen zimt, Und das á mit dá Zeit Hintá gmoanö Leut kimmt. Woltá gscheid háts ollsaná Und 's Land habts recht gern, Drum mechts ös halt haben, Dáß márs á sollten wern. 's Is freilö Vielmächttögn In dá Dtadt goa nöt recht, Sö wötzen iehn Schnabl Und kráhn: — ás is schlecht. — Wanns überall Tag wird Is in Finstán dánöbn Á traurögö Zeit Und á müehselögs Löbn. Is á müehselögs Löbn Und á traurögö Zeit, Wann dasseldö, das putzen soll 's Liecht nu umkeit. Mein Löbtá han is ghert Und ás bleibt dös alt' Gspiel, Worá gschlagn is dá Batzen, Da gilt á nöt viel. Abá laßts enk nöt irren, Ös wißts ja wies geht, Und wie lang ols má z'prödögn Hat, bis's Oans vásteht, Das bockboanög is So á Bißl, wier i — Hau, i kann nix dafür Dáß i dickschedlát bi. — d' Schriftglehrten I bin der Oanzög, Der's kennt und der's gspürt, Zwö á napfözáds Leut Nöt leicht schláfárög wird. Und i bin der Oanzög, Der's woaß und der's kennt, Zwö á Suppen á hoaßö Oan d' Goschen vábrennt. Und i bin der Oanzög, Der's kennt und der's woaß, Warum und zwößwögn Ols i Hansmichel hoaß. Nár i ganz álloan Kanns richten und toan, Daß d'Roß nimmá ziegn Und dáß d'Taubn dávanfliegn. Söch Spárgámentá Habnt z'náchsten áf d'Nacht, In Broihaus bán Öcktisch Jehná vier Manná gmacht; Und so gscheid habnts dá gment't Und so haochglehrt g'restiert, Dai gmoant allö Vier Habnt áf án Dokta g'studiert. Á Weil han i zueghert Bis i 'n Nachbárn han gfragt: Wer hánd denn dö Vier da? Und losts, was er gsagt: Vier Schriftglehrtö, Vöttá, Huckán dodá bánand, Zween aghaustö Bauern Und zween in dá Gant. Do sehts ös dö Glehrten, Mit'n Mauöl hánds da, Kimmts abá zán Weká Da hoaßts aft: i — a. d' Lieb Á Lieb dö recht stark is, Dö plodert nöt gern, Wiest á Wassá das tief is Nöt rauschen wirst hern. Wie dá Sunnstrahl z'Mittag So schuekrad und brennhoaß, Kimmts hoamlá in's Herz Wos án Zundá drin woaß. Und hats aften gfangá, Váschlahts dá glei d'Röd, Brinnt aussá bán Augnán, Do hern kannst ás nöt. Abá d'Augn wern Oan glanzád, Wie Glas werns so hell, Siegst duri und duri, Siegst hin bis áf d'Seel. Was braucht má da z'plampern Wo márs ehntá schan sieht, Was drinát in Herzen Olls fürgeht und gschieht. Drum denk i und sag i, Und b'haup á für gwiß, Dáß á Lieb dö viel G'schmatz braucht Dö rechtö nöt is. Bá dá Lieb is 's nöt woahr, Wanns gschriebná glei steht, Dáß, vá was dá 's Herz voll is Dá Mund übágeht. Du müeßátst ná krad Oppát 's Bußerln vástehn, Nu aften meintwögn Mecht Oan 's Mäul übágehn. Dá Niegnueg I bin dert so kloan Und mein Durst is so groaß, Ja, i derft mi dátränká So brácht i'n nöt laos. Vá mán Sauffá sagn d'Leut I mags hern odá nöt, Ván Durst abár is kám Án oanzögs Mal d' Röd. Hau, á Kropfádá rosselt, Á Krumpá der hinkt, Und á Hungrögá ißt, Wier á durstögá trinkt. Jehn dumms Räsánieren, Is koan Bresl mehr wert, Wie'n Menschern iehn Plodrát Das is zöfta schan ghert: "Wann i wiedár áf d' Welt kimm, So wir i á Bue, Und d'Menschá fexier i már Gwiß aften gnue." So hat á iehn Plampern Koan Hand und koan'n Fueß, Weil á Niedá, der durstög is, Trinkár á mueß. Kann i öppá dáfür, Dáß dá Durst nöt ausbleibt, Der mö plapt und segiert Und ins Wirtshaus furttreibt. Denn kám mach i d'Augn áf In ollá Gotts früe, Is má d' Zung schan so ridárösch Mueß s' woakár in Bier: Is dá Goam schan so sper Und nußtruká dá Schlund, Dáß á, wann i 'n nöt nötzát, Má zamschliefá kunt. Er schnurrfát má zsamm Wier á Schueh, der nie gschmiert, Nie eingwoackt, nie putzt Und nie agwaschen wird. Denn 'sLöda, woaßt wohl, Derf dá z'trucká nie wern, Und dá Schlung, sagn dö Bádá, Is á lödánö Rehrn. Wann i 's erstö Mal trink Sausts dár ahö dai moan, Nix aners is ünt Ols á brennhoaßá Stoan. Ás is dnettá und krad, Áz wanns hi und hi brunn, Odá z'wanns übár Eisen, Das glüetád, wöckrun. Á Dampf geht in d'Heh, Bá dá Nasen steigts aus, Wie dá Ruck durin Raufang, Wanns brinnt in án Haus. Und natürlög is's aft Dá má nu án Trunk tuet, Denn leichtár ols 's Foiá Dálöscht má dö Gluet, Han i zöftá schan ghert, Abá gwiß is's nöt wah, Weil i 'n ganzen Tag dráfschütt Und dert löschts nöt a; Wie mehr als i dráfgieß, Wie greßá wird d'Gfoahr, Und wanns lang á so furtgeht, Vábrinn i nu goar. Und bán oll den mán Trachten, Wann i Nacht und Tag tue, Dá is wögbring das Foia Is's 'n Leuten nöt gnue: Er lumpt und er sauft, rödns, Und gnueg hat á nie, Schau das is dá Lahn Für mein Plabn und mein Müeh. Ja sö wissens á schan Wierö stiröb á Mal, Und sö wissens so gwiß, Dáß s' dá sagn überall: "In Mauöl dö Pfeifá In dár Hand 'n Bier-Krueg, Á so wird á steröbn Werds segn, dá N i e g n u e g. Dá Sunntag Dá Sunntá der is már Mein zwidrögstá Tag, So vádrossen bin i moast, Dái mi selbá nöt mag. Denn weil i nix z'toan Und koan Arbát nöt han, So fang i zun stritten Und nachsiniern an. Denk áf mein Ölend, Mein Kreuz und mein'n Schmerz Und krieg aftát ollmál Á zenkenschwárs Herz; Denk áf á schens Gsichterl, Das mi lang hat betrogn, Und denk áf zwoa Augn Dö mi dämösch anglogn; Denk áf dö Zeiten, Dös ehentár hat göbn, Und aft moan i ollmal, I mag nimmá löbn; I mag nimmá löbn, I han nix mehr da z'toan, Habnt mö angschmiert ollsaná Vá lautá guet moan. 's Reserl Á Reserl von Zaun Han i brockt Sunntá früeh, Han má 's Leiböl kloan zrissen Und zfetzt 'n Kalie. Han mi gstochár in d' Fingá Und zkrailt dö ganz Hand, Hot brennt morziálösch, Und 's Bluet fürázant. Abár i han koan Bluet Und koan Brenná nöt g'acht, So á Freud hat már 's Reserl Wier is brockt han ghabt gmacht. I hans goa nöt ausgreint Dáß's mi zkratzt hat und ghöckt, Ná, trest't han is nu Und áfn Huet aufögstöckt. "Sá guet, má liebs Reserl, Hai zfrim mit den Platz, Kriegst eh glei án bößern, I schenk dö mán Schatz, Und d' Nanö, das woaß i, Wo si dö hintuet, Mecht selbá gern doll sein, Abá mir täts — koan Guet, Sagts wenögstens ollmal, Wann i so dávon röd, Mag sein dáß's á woahr is, Abár i — glaub ihrs nöt." So han i 'n Reserl Fürplodert án Eicht, Daß's má denert 's Abrocká Vágibt und vázeicht. Vázeicht und vágibt Und nöd hárb is áf mi, Dái goa so vápickt Krad áf sie gwösn bi. Und richtög mein Gschmátzád Hats aft so weit bracht, Daß's duri zwoa Záherl Hat herguckt und glacht. Und so lieb und so g'schmach Hats dár herglacht und guckt, Wie d'Nánö, wir is 's erstö Mal Bußt han und druckt. Ákrát áz wie sie, Hats már 's Schnáberl hergröckt, Abá 's Äugerl und 's Gsicht Hats ins Knöpferl vástöckt. Mein bösten Kamáraden 'n Seppen 'n Franzen sein Brief Han i glei übágöbn, Hat'n ságárösch gfreut, Er hat gschriern: "Er soll löbn!" Er soll löbn! han i mitgschriern, Dá schwarzaugát Sepp, Nach den, was á schreibt Is á dert nu koan Depp. Is á dert nu koan Dalk Und sán Hirn is nu gsund, Du mein Gott dáhalt iehms Bis áf dö lötzt Stund. "Du schreib bal und grüeß márn Und sag iehm für mi: Er kennt mi schan lang Und er woaßs wieri bi; Er woaß wieri bi, Dáß i goar not gern schreib, Döstwögn abá denná Sein altá Franz bleib. Mein stad sein, das macht nix, Soll warten á Trum, Er wird schan nu rödád Dár Augádlá Strum. In Wintá da singt dár Koan Waldvogel gern, Nár 'n Spatznárn iehn Gspazárát Kann már allöweil hern. Kimmt abá dá Früehlöng, Ás währt nimmá lang, Aftn wird á schan klingá Mein Waldvogelsang. Sein Frau loß i grüeßen Und d'Kiná ollsand, In Summá wieri moan, Wir igs finden bánand. In ötlögö Wochán Mag sein, dáß i schreib, Abár iezund, i bitt dö, Tuen grüßen báleib." d' eisánö Pfoad A Gwahnát án altö Is án eisánö Pfoad, Hot má d'Mueder oft prödögt, Und woahr is 's, mein Oad. Was dá Sepei hat tan, Tuet dá Sepöl schan furt, Und á Wuná müet gschehá, Wann ár anástá wurd. Is dá Hiesei á Bümpferl, Wird á Hies gwiß á Bumpf, Und is 's Urschei á Stümpferl, Wird d'Ursch  goar á Stumpf. Hat dá Hansei á Knöpferl, Wird á Knopf aus 'n Hans, Uns is 's Dierndl á Gánsei, Wird 's Mensch ár á Gans. Is dá Rüepei á Lümperl, Wird dá Rüepöl á Lump, Dens Oans und dens gleich is Geht’s krad odá krump. Á so hats má prödigt, Weil i kloan gwösen bin, Abá hau, doll hat már Für á Prödög koan Sinn; Bán oan Aoern einhö Und aussö bán an, Loßt márs prödögn und bráchten Und toan, — was má toan. Und á so wachsen d'Unfürm Mit üns aftát áf, Du megst nixö g'richten Schlüegst nu á so dráf. Sö wernd mit dá Zeit aft Zár anern Natur, Dáß dár ehnter Oanch sturöb Eh á d'Unfürm válur. Er sturöb vá Trüebsal, Ás váziehrát 'n 's Load, Wann ár umágehn müeßát Ohne eisáná Pfoad.